QUINTELA DE MAZAIRA

Description

Sin stock. Solicite información

Quintela pertence á parroquia de Mazaira, concello do Castro de Caldelas, e ao partido xudicial da Pobra de Trives (provincia de Ourense). Linda coas parroquias de Vilardá, Santa Eulalia, Folgoso, Vimieiro e Medos. Non hai datos históricos da fundación da pequena aldea de Quintela nin tampouco da parroquia á que pertence. Pero semella plausible que as condicións de vida, tanto laborais como de alimentación, se remontan á Idade Media e que tivo poucos cambios ao longo dos séculos.

A realidade de Quintela é común en moitos aspectos á das aldeas da Galicia rural das provincias interiores e, ao mesmo tempo, amosa trazos específicos, como por exemplo a súa situación xeográfica de illamento. Isto provocou que durante séculos existisen de xeito inalterable unhas formas de traballo, de vida e de relación veciñal.

Trátase aquí de transmitir o testemuño dun mundo que desa­parece, así como tamén de facer unha reflexión sobre a dirección que tomou este tren de alta velocidade cara a unha globalización que nos obriga a perder a nosa identidade que sobreviviu durante séculos no seo dunha comunidade que, con algunhas diferenzas normais á hora de compartir a miseria, soubo partillar a obrigada solidariedade para po­der tirar para adiante, aínda pasando longos períodos de precariedade económica e carencia de todos os compoñentes do que coñecemos hoxe como «estado do benestar».